యువత చూపు లఘు చిత్రాల (Short Films) వైపు !

             యువత తామెంచుకున్న అంశానికి కొంత సృజనాత్మకత, మరి కొన్ని ఆలోచనలను జోడించి అద్భుతమైన నేపద్య సంగీతంతో , చక్కటి సంభాషణలతో తమకి నచ్చినట్లుగా, మనందరం మెచ్చే విధంగా రూపొందించిన తక్కువ నిడివి గల చిత్రాలే ఈ లఘు చిత్రాలు (Short Films). 5, 10 మహా ఐతే 25 నిమిషాలు ఉండే ఈ పొట్టి చిత్రాలు యువత ఆలోచనలను బయట ప్రపంచానికి దృశ్య రూపంలో ఆవిష్కరించటానికి ఉపకరిస్తున్న అందమైన సాధనాలు. నేటి ధోరణికి అనుగుణంగా, వర్తమాన అంశాలు , సమాజంలో జరుగుతున్న సంఘటనల ఆధారంగానే వీటిని తెరకెక్కిస్తున్నారు.

       ప్రియురాలి ప్రేమ కోసం ప్రియుడు చేసే చిత్ర విచిత్ర విన్యాసాలు, కాలేజి రోజుల్లో జరిగిన హాస్య సంఘటనలు, ప్రేమే జీవితం కాదంటూ హిత బోధలు, టి.వి చానెళ్ళలో ప్రసారమయ్యే వివిధ కార్యక్రమాలకు ఇంకా ప్రకటనలకు అనుకరణలు, ప్రముఖ సినిమాల్లో సన్నివేశాలకు పేరడీలు, సినిమా విడుదల అనంతర విశ్లేషణలు (Movie Reviews), రాజకీయ పార్టీల కుప్పిగంతులు, మాటలే లేని మూకీ చిత్రాలు  ఇలా అంశం ఏదైనా తాము తీసే లఘు చిత్రం మిగతా వాటి కంటే వైవిధ్యంగా, హాస్య భరితంగా, నెటిజెన్ లలో తమను
ప్రత్యేకంగా నిలపాలని నేటి యువత నిరంతరం తపిస్తున్నారు...దానికి తగ్గట్లుగా కష్టపడుతున్నారు కూడా.

        యువత లఘు చిత్రాల బాట పట్టడానికి ఎన్నో కారణాలున్నాయి. వీటిల్లో నటించే నటీనటులకు అనుభవం ఉండాల్సిన అక్కర్లేదు. సినీ రంగంలో లా ప్రముఖుల కొడుకులు, కూతుర్లుగా పుట్టాలనే అర్హత ఉండదు. లోకేషన్ల కోసం విదేశాలు  తిరగవల్సిన పని లేదు. అంతా కొత్తే. దర్శకుడు కొత్త, నటిస్తున్న తారాగణం కొత్త వారు, సాంకేతిక నిపుణులు, గాయకులు ఇలా అంతా యువ రక్తమే. అందరికీ తొలి ప్రయత్నమే. మన చుట్టూ ఉండే పరిసరాల్లో అత్యాధునిక కెమెరాతో షూటింగ్ తీసి కొంచెం శ్రద్ధగా ఎడిట్ చేస్తే చాలు. తయారైన లఘు చిత్రాన్ని యూ ట్యూబ్ లో ఎక్కిస్తే (Upload) సరిపోతుంది. అందుకే ఒకప్పుడు నగరాలకు పరిమితమైన లఘు చిత్రాల నిర్మాణ సంస్కృతి దేశం నలుమూలలా పాకిపొయింది. విద్యార్ధులు, స్నేహితుల బృందాలు, ఉద్యోగులు , ప్రవాసాంధ్రులు, మారు మూల పల్లెల్లో యువకులు ఇలా ఎంతో మంది తమ అభిరుచికి తగ్గట్లుగా లఘు చిత్రాలు నిర్మించి అందులో నటిస్తూ తమ వాణి వినిపిస్తున్నారు.

        ఈ పొట్టి చిత్రాలను ప్రపంచంలో ఎక్కడివారైనా చుసే విధంగా ప్రదర్శించే థియేటర్ పేరు యూ ట్యూబ్. అంతర్జాలం (Internet) వినియోగించేవారిలో యూ ట్యూబ్ గురించి తెలియని వారు లేరంటే అతిశయోక్తి కాదు. ఒక విధంగా చెప్పాలంటే యూ ట్యుబ్ లేకపొతే ఇంతమంది ప్రతిభావంతులు వెలుగులోకి వచ్చేవారే కాదు. లఘు చిత్రాల నిర్మాతలకు, నటీనటులకు, సంభాషణా రచయితలకు, గాయకులకు రాత్రికి రాత్రే ఆదరణ పెంచేసి సినిమా అవకాశాలను సైతం అందించేలా చేసే కల్ప వృక్షం, ధన లక్ష్మి ఈ యూ ట్యుబ్. ఎంతమంది ఈ లఘు చిత్రాలను యూ ట్యూబ్ లో వీక్షిస్తే నిర్మాతలకు అన్ని డబ్బులు.

         అందుకే లఘు చిత్రాల నిర్మాణాన్ని ఉపాధిగా ఎంచుకునే వారి సంఖ్య పెరుగుతోంది. లఘు చిత్రాలకు ఆదరణ ఏ స్థాయిలో ఉందంటే తమ రాబోవు లఘు చిత్రాలకు లఘు ప్రచార చిత్రాలు (Trailers of Short Films), ప్రచార గీతాలు (Promo songs) ( అంటే మన సినిమాకి ప్రచార చిత్రం(trailer) ఎలానో అలా అన్నమాట) విడుదల చేసి మరింత ఆసక్తి రేకెత్తిస్తున్నారు. భాషా బేధాలు లేకుండా అందరికి చేరువయ్యేందుకు  ఇంగ్లీష్ లో సబ్ టైటిల్స్ వేస్తున్నారు. ఎం.ఆర్. క్రియేషన్స్ , సినిమా పిచ్చ వంటివి ఈ కోవలోనివే.     ఇదంతా చూస్తుంటే మీక్కూడా ప్రయత్నించాలని ఉంది కదా! ప్రయత్నించండి మరి.  ఆల్ ది బెస్ట్.  

         నాకు నచ్చిన లఘు చిత్రాలలో కొన్ని మీ కోసం ఇక్కడ ఉంచాను. చూసి ఆనందించండి.  

2013..ధరలవాత నామ సంవత్సరం ఎందుకంటే ?

        2013 సంవత్సరం సగటు మనిషికి బాగా గుర్తుండిపోతుందేమో! ఎందుకంటారా? సామాన్యుడిని ఉలిక్కిపడేలా చేసిన సంవత్సరమిది. కుటుంబ బడ్జెట్ ని తల క్రిందులు చేసిన ఘనత కూడా ఈ యేటిదే.

          పెట్రోల్ మరియు డీజిల్ ధరలు, రైలు ఇంకా బస్సు ప్రయాణ టికెట్ల ధరలు, విద్యుత్ చార్జీలు ఒకటేమిటి అన్నింటి ధరలు గత సంవత్సరంతో పోలిస్తే అమాంతం పైకెగసాయి.నిత్యావసరాల ధరలు చుక్కలతో సహవాసం చేస్తూ కిందికి దిగి రానంటున్నాయి. ఈ ధరల బాంబు వంటింటిని కూడా వదల్లేదు. పరిమిత సిలిండర్ల పేరుతో గ్యాస్ సిలిండర్ సంఖ్యను కుదించేసారు. కుదింపుతో ఊరుకోక అదనంగా వాడుకోవాలనుకుంటున్న సిలిండర్ ధరను కొండెక్కించారు.

           ఒక్క డీజిల్ ధర పెంచితే సామాన్యుడిపైన తీవ్ర ప్రభావం పడుతుందనేది జగమెరిగిన సత్యం. పెట్రోల్, డీజిల్ ధరలపైన నియంత్రణ ఎత్తివేసి చమురు కంపెనీ ల ఆటలో పావుగా మారిన ప్రభుత్వం నిత్యావసరాల ధరల పెరుగుదల, డీజిల్ ధరల పెరుగుదలతో ముడిపడిందన్న సంగతి మరచిపోయింది. రోడ్డెక్కితే టోల్ ట్యాక్స్ వాత, రోజు వారి సరకులపైన సర్వీస్ ట్యాక్స్, వస్త్రాలపైన వ్యాట్ ట్యాక్స్ మోత మోగిస్తున్న సర్కారు విద్యుత్ చార్జీలకు అదనంగా సర్దు బాటు చార్జీలు విధించి సామాన్యుడిని సర్దుకుపోమని చెప్తుంది.   

     వేసవిలో తాగునీరు దొరక్క పేదలు, పంటలు పండించడానికి సాగు నీరు లేక ఒకవేళ పండితే సరియైన ధర లేక రైతులు , విద్యుత్ కోతతో పరిశ్రమలు, ఉద్యోగాలు లేక నిరుద్యోగులు , వృద్ధి లేక ఆర్ధిక వ్యవస్థ దిగాలుగా ఉంటే సందట్లో సడేమియా అన్నట్లుగా సర్కారు తన అమ్ముల పొదిలొని ధరల పెంపు భాణాల్ని ఒక్కొక్కటిగా సంధిస్తూ ఉంది. ఈ సారైనా కరుణించి బడ్జెట్లో రాయితీల జల్లు కురిపిస్తారని వేయి  కళ్ళతో ఎదురు చూసిన వేతన జీవికి అలాంటి వరాలు తమ నుండి ఆశించవద్దని గట్టి సందేశమే పంపింది. ఆరోగ్య ఖర్చులు , అద్దె భత్యాలు , ద్రవ్యోల్బణం పోటు , ప్రయాణ ఖర్చులు యేటికేడు పెరుగుతున్న ప్రస్తుత తరుణంలో సామాన్యుడి రోదనని వినలేని , వినిపించుకోని ఈ గుడ్డి సర్కారుకి బుద్ధి చెప్పే రోజులు త్వరలోనే రాబోతున్నాయి.  

       సంకీర్ణ ప్రభుత్వంలో లుకలుకలు, అధికార పీఠంపై అనిశ్చితి, ఉగ్ర దాడులు నిరోధించడంలో వైఫల్యం, రోజుకో కొత్త స్కాం , మహిళ రక్షణలో రాజీపడటం, విదేశీ అతిధులకు మన దేశంలో రక్షణ కరువవడం, విదేశాంగ విధానంపై అస్పష్టత , నల్ల ధనం వెనక్కి తీసుకురావడంలో వైఫల్యం, ధరల పెరుగుదలని నియంత్రించలేకపోవడం , సరి ఐన ముందు జాగ్రత్త చర్యలు చేపట్టకుండా రిటైల్ రంగంలో విదేశి  పెట్టుబడులు స్వాగతించడం, సొంత లాభాలకు సి.బి.ఐ ని వాడుకోవడం,  ప్రజల జీవన ప్రమాణాలను మెరుగు పర్చలేకపోవడం , మతాల మధ్య మరియు ప్రాంతాల మధ్య చిచ్చు రేపడం, విదేశి పెట్టుబడుల ఆకర్షణలో తిరోగమనం, ఆర్ధిక వ్యవస్థ మందగమనం, అవినీతి మంత్రులకు మరియు అధికార్లకు అండగా ఉండి అవినీతి విష వృక్షాన్ని విస్తరించడం, సంక్షేమ పధకాలంటూ సామాన్యుల చెవిలో పూలు పెట్టడం ఇవి అన్ని యు.పి.ఎ సర్కారు మరియు కిరణ్ ప్రభుత్వం సమిష్టిగా సాధించిన ఘనతలు. ఇన్ని ఘనతలు సాధించిన ఈ రెండు ప్రభుత్వ నావలు ప్రజాగ్రహం, ప్రజల వ్యతిరేకత అనే సముద్రంలో మునిగిపోవడం ఖాయం.         

తెగించే మృగాళ్ళకు ముగింపు పలికే మార్గాలు

          సహనానికి మారుపేరైన స్త్రీ మూర్తి అసహనానికి గురైంది. వాడ వాడలా చైతన్యం రగిలింది. గృహిణులు, ఉద్యోగినులు, యువతులు, బాలికలు ఇలా యావత్ వనితా లోకం కన్నెర్ర జేసి మృగాళ్ళకిక ముగింపు పలకాలంటూ కదం తొక్కింది. మన దేశంలో నానాటికి స్త్రీలపై పెరుగుతున్న లైంగిక వేధింపులు , ఆకృత్యాలపై ప్రభుత్వాల నిర్లక్ష్యాన్ని ప్రశ్నించింది. జనాభాలో సగ భాగం తామే ఐనప్పటికి తమకు భద్రత కరువైందని ప్రజా ప్రతినిధులందరిని నిలదీసింది. ఉవ్వెత్తున ఎగిసిపడిన ఈ ఆగ్రహ జ్వాల ప్రభుత్వాధినేతల గుండెల్లో రైళ్ళు పరుగెత్తేలా చేసింది.

           పుణ్య భూమి ఐన భారతావనిలో అనాదిగా స్త్రీని ఆది పరాశక్తిగా కొలుస్తున్నారు.  ఎంతో మంది పతివ్రతలకు , ధీర వనితలకు జన్మనిచ్చింది ఈ భరత భూమి. ఇంట్లో ఆడ పిల్ల జన్మిస్తే సాక్షాత్తు శ్రీ మహాలక్ష్మే  మన ఇంట అడుగుపెట్టిందని పొంగిపోయి సంబరాలు చేసుకునే సంస్కృతి మనది. పుట్టినింటి గౌరవంతో పాటు మెట్టినింటి గౌరవ మర్యాదలు కాపాడే ఆమెను సమాజంలో విష సంస్కృతికి అలవాటుపడిన కొందరు మృగాళ్ళు కబళిస్తూనే ఉన్నారు. ఇంకా ఎంతకాలం ఈ వేధింపులు ?

           ఈ అన్యాయాలకు అంతం మన పాలకుల దృఢ నిశ్చయంతోనే సాధ్యమవుతుంది. అధికారమంతా మన దేశంలో మహిళామణుల 'చేతుల్లోనే' ఉంది..ఐనా భారతీయ మహిళకి రక్షణ కరువవుతుంది. అధికారమేంటి? మహిళల చేతుల్లో ఉండటమేంటి అంటారా..?  మనదేశంలోని ప్రధాన రాజకీయ కూటములైన యు.పి.ఎ అధ్యక్షురాలు సోనియా గాంధీ, ఎన్.డి.ఎ అధ్యక్షురాలు సుష్మా స్వరాజ్ మహిళలే కదా! ఇటీవల ఢిల్లీలో జరిగిన అత్యాచార ఘటనతో దేశమంతా విస్తుపోయింది.  ఆ రాష్ట్ర పీఠం పైన కూర్చొని అధికారం చెలాయిస్తున్న షీలా దీక్షిత్ కూడా వనితే మరి.

           వీళ్ళే కాదు 2014 ఎన్నికల తరువాత కేంద్ర ప్రభుత్వాన్ని తోలు బొమ్మలాడించే సత్తా ఉన్న తమిళనాడు , పశ్చిమ బెంగాల్ రాష్ట్రాల ముఖ్యమంత్రులు జయ లలిత, మమతా బెనర్జీ ఆడ వారే. ప్రస్తుత యు.పి.ఎ ప్రభుత్వంలో ప్రధాన మద్దతుదారుగా ఉన్న మాయావతి మహిళే. వీరికి తోడు లోక్ సభ, రాజ్య సభల్లో వందలాది మంది మహిళా ఎం.పిలు , వివిధ రాష్ట్రాల్లో అనేకమంది మహిళా ఎం.ఎల్.ఎలు  ఉండనే ఉన్నారు. వీరందరూ కలిపి తమ పిడికిలి బిగిస్తే ఈ మృగాళ్ళ మెడలపైన ఉరి తాళ్ళు వేలాడవంటారా ?

            లైంగిక వేధింపులు, అత్యాచారాలు, ఆమ్ల దాడులు చేసినవారికి విధించే శిక్షలు మరో మారు నాగరిక సమాజంలో ఎవరు కూడా ఆ దిశగా ఆలోచన చేసే అవకాశం లేనంత భయకరంగా ఉండాలి.

  1. 2 నెలల్లో లైంగిక వేధింపుల కేసులు పరిష్కరించి, శిక్ష ఖరారు చేసి వెంటనే అమలు చేయాలి. జిల్లాకో ప్రత్యేక న్యాయస్థానం ఈ కేసుల విచారణకి ఏర్పాటు చేయాలి .

  2. కనీసం 30 యేళ్ళ పాటు కఠిన కారాగార శిక్ష విధించాలి.

  3. స్త్రీలపై లైంగిక వేధింపుల ఆరోపణలు ఎదుర్కొనేవారిని చట్ట సభలు జరిగే ఎన్నికలతో పాటుగా మరే ఇతర ఎన్నికల్లోనూ పోటీ చేయకుండా అనర్హుడిగా ప్రకటించాలి.

  4. చట్టాల్ని నేరస్తులు చుట్టాలుగా మార్చుకోకుండా ప్రస్తుతమున్న అనేక లొసుగులని తక్షణం సరి చేయాలి.

  5. స్త్రీ రక్షణకై భారత దేశ వ్యాప్తంగా ఒకటే టోల్ ఫ్రీ నంబరుతో సహాయ కేంద్రం ఏర్పాటు చేయాలి.

  6. వివిధ రాష్ట్రాల ప్రజా రవాణా వ్యవస్థల్లో, రైళ్ళలో వీలైంత మంది మారు పోలీసులను (మఫ్టీ) నియమించాలి.

  7. మహిళా పోలిస్ స్టేషన్ల సంఖ్యను , మహిళా రక్షక భటుల సంఖ్యను పెంచాలి.

  8. తల్లిదండ్రులు తమ పిల్లలకు గోరు ముద్దల్లో నైతిక విలువలు జోడించి తినిపించాలి.

         వీలైనంత త్వరలో స్త్రీ ల రక్షణ కోసం కొత్త చట్టాలు తెచ్చి,ఉన్న చట్టాలను పదును పెట్టి ఈ మృగాళ్ళ(బరి తెగించిన మగ వాడు) అంతు చూడాలి.